దొరకుతావురా సహోదరా! దొరుకుతావురా, నీవు

చిన్న చూపు చూచి తమ్ముని కన్నెఱుంగక చంపినగాని అన్న కయీను దేవుని హస్తమునకు దొరికిన రీతిగా ||దొరకుతావురా సహోదరా!||

వరములొందిన తమ్ముని జంప వలయునని పంతముగబట్టి నరకవచ్చిలోబడి యేడ్చిన దురిత చరితుని యేశావువలె ||దొరకుతావురా సహోదరా!||

భక్త దావీదును బట్టి ప్రాణము దీయగ దలచిన తన శక్తితో తరిమిన రాజగు సౌలు దొరికినరీతిగాను ||దొరకుతావురా సహోదరా!||

విగ్రహమునకు మ్రొక్కని దైవ పిల్లల నగ్నిలోపడవైచి ఆగ్రహించిన నెబుకద్నెజరు గడ్డిమోసి దొరికిన విధముగ ||దొరకుతావురా సహోదరా!||

క్రైస్తవులను బట్టి కొట్టి ఖైదులో వేయదలచినను వాస్తవమగు వెలుగును జూచి ప్రభుని చాటిని పౌలుబోలి ||దొరకుతావురా సహోదరా!||

కీడుచేయబోకు మెపుడు కీడు నీకే కీడు కీడు కీడు చేసినమేలుచేసి కీడును జయింపకపోతే ||దొరకుతావురా సహోదరా!||

మాటలు కుదిరితే మాటలు కోటలు కుదురును నీకు మాటలలో లోటుంటే నోటిమాట తప్పకుండ ||దొరకుతావురా సహోదరా!||

దొంగతనము వ్యభిచారమునకు లొంగి శాపగ్రస్తులునై దొంగిలించిన దశమభాగమే లొంగుట కారణమని తుదకు ||దొరకుతావురా సహోదరా!||

కొంతయిచ్చిన దశభాగ మంత యిదియని తప్పుకున్న కొంతయిచ్చిన కయీనువలె కొంతయిచ్చిన అననియవలె ||దొరకుతావురా సహోదరా!||

చెడుగుచేసి బదులు దానిని చేసినారని చెప్పమన్న వడిగ దేవుని న్యాయమనెడి పరమత్రాసులో నిలువండి ||దొరకుతావురా సహోదరా!||